Հագեցած ու բազմազան էր այս կիրակին դպրոցում, չէ որ նշում էինք միանգամից երեք տոն` Տեառնընդառաջը, Սբ. Սարգիսն ու Բարեկենդանը:
Օրը սկսվեց դպրոցի խոհանոցում, ուր ավագ դասարանների աշակերտները թխեցին ավանդական աղի բլիթները:
Այնուհետև շտապեցինք եկեղեցի` միանալու պատարագին և ստանալու տեր Վազգենի օրհնությունը: Տեր Վազգենը, նախքան երիտասարդների օրհնության կարգը կատարելը, ներկաներին խոսենց տոների նշանակության մասին ու հրավիրեց բոլորին ջերմորեն ողջունելու երեխաներին, իսկ նրանք էլ ներկայացրեցին տոների խորհուրդը և ավանդույթները: Շատ ուրախալի էր, որ ներկաներից շատերը իրենց հետ տուն տարան տաք-տաք աղի բլիթները... մեկ էլ տեսար...
Տոնակատարությունը շարունակվեց դպրոցի բակում: Այստեղ ուսուցիչները բոլոր-բոլորին պատմեցին թե ով է եղել Սուրբ Սարգիսը, ինչ է նշանակում Տեառնընդառաջ և ինչ պատմություն ունի տոնը, ինչի են Բարեկենդանի վեջին օրը սարի գլխից վայր գլորում Ուտիս Տատու տիկնիկը և ինչի է նրան փոխարինելու գալիս Պաս պապը:
Մեր ծնողական կոմիտեն ինչպես միշտ բարձունքի վրա էր իր կազմակերպած համեղ հյուրասիրությամբ, որին հաջորդեցին ուրախ պարերն ու երգերը, խարույկի վրայով թռնելն և խաղերը:
